nýr dagur..

Wed, 23 Jul 2008 20:29:01 GMT

YES YES YES!!!

Ætli það verði mikið um færslur á næstunni...

Heim á ný

Thu, 17 Jul 2008 19:19:38 GMT

Eftir langþráð frí í Stóra-Bretlandi erum við hjónin komin heim og er það vel. Ég gef þessu fríi 4 stjörnur af 6 mögulegum.

      * Hittum fyrir gamla vini frá Manchester tímabilinu
      * Ferðuðumst með lest norður til Skotlands fram hjá grænum engjum og þokukenndum nautgripum
      * Dvöldum í gömlu bóndabýli í Speyside héraðinu hvar mamma, pabbi og Vala hittu okkur
      * Marineruðum okkur í whisky meira eða minna allan tímann sem við vorum þar (ahhh...)
      * ~~Veðrið var æðislegt og sólin lék við hvern sinn fingur~~
      * ~~Kom endurnærður heim og tilbúinn að takast á við morgundaginn~~

..en maður getur svosem sagt sjálfum sér að frí í Skotlandi verði frekar í blautari kantinum en hitt.

...

Þrátt fyrir að ljósmyndin hér til vinstri sýni glas með blönduðu vískýi þá var vitaskuld ekki mikið gefið fyrir svoleiðis sull. 4 eimingarhús voru skoðuð og eftir alla túrana mátti púsla saman vitneskju um eimingarframleiðsluferlið frá bútum af því sem öskrandi unglingarnir miðluðu til okkar.

      + Strathisla (Keith)
      + Glen Moray (Elgin)
      + Glenlivet
      + Balvenie (Dufftown)

Auk þess fórum við á kynningu í viskýsafninu í Dufftown hvar fulltrúi Glenmorangie deildi með okkur sex flöskum. Reyndar var síðasti túrinn (Balvenie) einna bestur enda "unglingurinn" á þeim bænum kominn á sjötugsaldur og hafði unnið í bransanum alla sína ævi. Þar á bæ halda men aukinheldur fast í hefðir og er þetta eitt af fáum húsum sem enn eru í fjölskyldueigu. Í flestum ef ekki öllum eimingarhúsum eru biggið keypt maltað frá stórframleiðendum en hjá Dalvenie nota þeir í bland sitt eigið bigg sem þeir hafa maltað eftir gamalli aðferð.

...

En ég nenni ekki að röfla um viský hérna á síðunni, enda lítið gaman af því að lesa um viský.

Er að vinna að því að setja upp Picasa myndasíðu, enda lítið gaman að lesa um annarra manna frí. Mun hlekkja ykkur við hana þegar uppsetningu er lokið.

Amen.

KISS & make-up

Mon, 16 Jun 2008 18:03:14 GMT

Nokkuð strembin törn að baki við hönnun miðflótta-afls kúplingar með innbyggðum gírkassa. Ekki mikið meira um það að segja. Hef einnig lokið hönnun sjálfvirx bílastæðaturns úr LEGO í samstarfi við mann og annan og svo líka konu. Stundum er Danmörk bara of frábær, maður fær styrk frá danska ríkinu fyrir að leika sér með barnaleikföng. Fengum líka hæstu einkunn fyrir. Jibbí-jei!!

...

Annars komu Jósi frændi og Stebbi maður svara til okkar í heimsókn á dögunum, þá helst fyrir þær sakir að ég narraði þá til að fylgja mér á tónleika með djassgeggjurunum í KISS, þar eð þeir komu við í Kaupmannahöfn á tónleikaferð sinni, Alive 35. Þökk sé andlitsmálingunni þá var ekki að greina mikla elli í fasi þeirra KISS-manna þrátt fyrir að sumir hverjir eigi ansi skammt í sjötuxaldurinn. Giggið var býsna gott og ég var eins glaður og skríkjandi smástelpa sem fengið hefur folald í jólagjöf frá ríka frænda sínum. Þeir keyrðu helst á gömlum slögurum frá áttunda áratugnum en svikust þó ekki um að spila hittarasúpuna í lokin. Einu bömmerarnir voru hljóðið í Forum og frammistaða áhorfenda í salnum. Það var eins og sumir vildu heldur drífa sig heim og horfa á Matador í fjögurhundruðogsautjánda skipti frekar en að öskra með og heddbanga sig til nálastungumeðferðar síðar meir. Heldur fannst mér Danir vera orðnir lúnir eitthvað.

Paul Stanley er víst kominn á þriðja mjaðmauppskurð. Ekki að sjá að það háði honum þó.

H.

Quake 2000 - Part II

Fri, 30 May 2008 06:24:57 GMT

Jænxúg!

Bara þrumuskjálfti heima. Það liggur við að maður fái barasta heimþrá, enda gerist aldrei neitt þessu líkt hérna í mýrinni. Farsælt að enginn hafi slasast alvarlega þó.

Það fyrsta sem mér datt í hug þegar ég las um skjálftann var þó þetta hérna sem gerðist daginn áður. Kannski langsótt tenging en hvað veit ég? A.m.k. ekki alltof mikið um jarðfræði. Kannski Pierce Brosnan geti hjálpað?

Fróðlegt væri þó að spyrja þessa konu hvað henni fyndist um þetta. Kannski höfum vér Íslendingar kallað þetta yfir okkur sjálfa.

...

Það eina sem skekur Danmörku eru upphlaup vandræðaunglinga og landsliðið í kvennahandbolta, hvorugt þó hafandi nokkurn alþjóðlegan skala til mælingar.

H.

Ekta maður og ekta kona

Sun, 25 May 2008 11:56:01 GMT

Þá er eitt próf að baki og annað eftir. Ekki get ég nú sagt að það hafi gengið neitt gríðarlega vel en maður uppsker það sem maður sáir, er ekki svo?

...

Veðurblíðan að drepa fólk! Það er ekki möguleiki að einbeita sér að nokkrum einasta hlut því það er sólskin og fuglarnir syngja í trjánum og allir krakkarnir eru úti að leika en ég þarf að húka inni við og lesa fyrir næsta próf. Hljómar eins og efni í íslenzkt dægurlag. Vont lag.

...

Hildur og Tóti gengu í hnapphelduna á föstudaginn var og bundu hnútinn í ráðhúsinu í Frederiksberg. Það ku hafa verið borgarstjórinn sjálfur sem gaf þau saman. Athöfnin gekk snurðulaust fyrir sig og vitni á staðnum fullyrtu við blaðamann að parið hafi verið í skýjunum yfir ráðahagnum.

Eftir athöfnina tóku brúðhjónin á móti gestum í almenningsgarðinum í Frederiksberg hvar sólin skaut geislum sínum á allt og alla.

Að brúðkaupsnóttinni lokinni kvaðst brúðguminn geta staðfest að brúðurin hafi verið óspjölluð eins og vera ber en átti engu að síður bágt með að útskýra bjúgvöxt mikinn á kviðnum, ef til vill væri röngu mataræði að um að kenna.

...

Jóakim Hinriksson, danskur prins, gekk einnig að eiga unnustu sína, hina frönskættuðu Maríu Cavallier, nú um helgina. Nú er prósentuhlutfall Frakka í dönsku konungsfjölskyldunni orðið heldur hátt og áður en langt um líður verður danskri tungu úthýst úr Amalienborg ef fram fer sem horfir.

En engin verður óbarin biskupsfrú. María er búin að lofa dönsku þjóðinni að læra dönsku. Fyrst að Hinrik drottningarmaður getur státað sig fram úr því, ættu aðrir Frakkar að geta það sama.

Það er þó skondið að sjá að þeir bræður Friðrik og téður Jóakim skuli hafa valið sér svo keimlíkar eiginkonur sem raun ber vitni. Ekki nóg með að þær heiti báðar María heldur eru þær afar svipaðar í útliti og fasi, a.m.k. fyrir almennilegum borgara eins og mér.

...

Rússar unnu. Æði.

Af hverju senda V-Evrópuþjóðir ekki sína beztu menn í þessa keppni í stað þess að láta einhverjar athyglissýkingar grassera á neonsprungnum dansgólfum með fljúgandi orrustu-myndavélum allt í kring? Ef við myndum senda Mugison eða Megas og Bretar sendu Morrissey (hann hefur nota bene sjálfur sagst myndu fara, yrði hann beðinn) og þar fram eftir götunum, þá væri þetta líka alvöru keppni. Er það ekki líka það sem austur-blokkin er að gera? Eru þessar leppalúður ekki stórstjörnur í eigin landi áður en þær eru sendar til slátrunar/sigurs á altari smekkleysunnar? Prófum það!

...

Au revoir

Support Denmark?!

Sat, 17 May 2008 16:33:54 GMT

Svona í tilefni þess að ég rak augun í einhvern klúbbinn á Fésbók, langar mig til að benda á nokkur atriði.

Eftir því sem ég kemst næst, þá er þetta félaxskapur fólx sem langar til að votta Dönum samúð og samstöðu í hinu svokallaða Múhammeðsteikningamáli sem öll börn ættu að hafa heyrt getið nú. Þá urðu frændur okkar Arabar sér í lagi svekktir yfir að teiknarinn Kurt Vestergaard skuli hafa skipt túrbani út fyrir logandi sprengju. Hótanir bárust og skipst var á skoðunum.

Gott og vel.

Ég styð og teiknifrelsi og prentfrelsi og nektarfrelsi og trúfrelsi og frelsi til að velja og Frelsi Símans og jájá..

..en mikið ósköp er þetta orðið barnalegt allt fyrir löngu síðan, og nú er svo komið að fólk er að safna í lið til að slást. Múgæsingur er afar lélegt fyrirbæri en það geta svosem flestir orðið fyrir barðinu á því, þ.e.a.s. ef þeir lesa sér ekki til um hvaða mafíu þeir eru að slást í hóp með, áður en þeir rita nafnið sitt á undirskriftarlistann.

...

Núna nýverið héldu Ísraelsmenn upp á að hafa harkað í Mið-Austurlöndum í 60 ár og afþreyingarmiðlar hafa verið duglegir við að rekja sögu þessa ólukkuríkis frá stofnun. Heldur hafa Palestínumenn orðið fyrir barðinu á þessum fléttuðu flónum þar sem þeir þurftu að gefa eftir landsvæði til að hægt væri að koma landleysunni á flot.

Þó svo ég einhvern tíman verið meðlimur af samtökunum Ísland-Palestína í samúðarskyni og verið andstæðingur Ísraelsríkis, þá vildi ég hvorugan málstaðinn taka upp ef ég yrði inntur eftir því í dag. Þetta snýst miklu meira um menn frekar en málefni. Í mínum fyrri tilraunum að sannfæra fólk um einhvern málstað, hef ég tekið eftir því að því meira sem ég rembist, því meiri fjarlægð skapast milli mín og fórnarlambsins/hlustandans.

Það væri örugglega alveg glimrandi gleði ef allir væru kristnir, eða allir múhammeðstrúar, eða enginn trú væri til. En svona er það bara ekki.. því miður. Þess vegna verður fólk að taka tillit til hvors annars.

Mér er andskotans sama hvort við höfum rétt til að segja og gefa út hvað sem okkur dettur í hug. Tjáningarfrelsi er án efa eitt af mikilvægari undirstöðum okkar menningar og ekkert okkar gæti gert sér í hugarlund að lifa lífinu öðruvísi. Maður verður líka að kunna að fara með það.

"Klukkan er sex, nú verða sagðar moðerfokking kvöldfréttir."

Þetta gæti Pétur Pétursson heitinn hafa sagt í útvarpi allra landsmanna. Við mundum bara ekki hafa kært okkur um það. Sama máli gegnir með að móðga heila þjóðflokka; tæknilega séð er ekkert sem getur bannað okkur að gera það, það væri bara gífurlega ósmekklegt og yrði örugglega illa tekið upp.

Jújú, þeir hóta að drepa þig í staðinn og það er jafnvel síðri hugmynd en sú fyrri. En hvernig ætlum við að bregðast við því?

"Jú, víst get ég sagt 'idda!! Víst, víst, víst, víst, víst!! Ég má það alveg!!!"

...

En aftur að Danmörkinni blessaðri. Nú hefur Danska Þjóðarflokknum tekist að hræða Andrés F. Rasmusen og restina af ríkisstjórninni svo hressilega með nýjasta baráttumálinu: Ef ekkert verður að gert, þá gætu dómarar framtíðarinnar verið með slæðu og dæmt fólk eftir Sharia lögum. Þetta er tóm klikkun, fyrir 4 vikum byrjuðu þeir að hengja upp veggspjöld um borg og bí hvar sjá mátti múslimska konu í búrku með dómarahamar (augljóslega tilbúin að dæma þig til geldingar fyrir vangoldin stöðumælagjöld). Nú í þessari viku sem leið var tillaga þess efnis að dómarar mættu ekki bera trúarleg tákn, samþykkt af Folketinget og stendur nú til að gera vitleysuna að lögum.

Svona hefur þessi hægri-öfga flokkur gott grip á eistunum hans Andrésar. Danskir dómarar eiga ekki eitt einasta orð yfir þessum sirkus og gátu hvergi komið að sínum málstað. Málið er ekki einu sinni á daxkrá: Það er engin múslímsk kona er að læra til dómara. Tómur hræðsluáróður.

Svo ætlar téður Andrés að troða upp sem formaður Evrópusambandsins ef orðrómurinn á við rök að styðjast. Heldur þættu mér það leið skilaboð að senda umheiminum ef þetta Davíðslíki sem telur sig ódauðlegan, færi að vesenast með fleiri haxmuni en raun ber vitni.

Skútan er farin að halla býsna mikið á stjórnborða ef þú spyrð mig.

...

~~Support~~ Educate Denmark!

H.

Ég þekkti einu sinni mann...

Tue, 13 May 2008 18:09:53 GMT

...sem vissi ekki að KISS væri bezta hljómsveit í heimi. Hann var líka afar illa upplýstur almennt.

Konan og bryggjan

Sun, 11 May 2008 20:24:48 GMT

Ég var að komast að því að ég get notað Nokia fjarskiptamyndavéladagbókina mína til að senda inn færslur á bloggið. Vá. Hvað næst? ..svartir forsetar?

Sun 11/05/2008 19:47 11052008262

Mother-child reunion

Sun, 11 May 2008 16:59:08 GMT

Það var heitt. Það var glimmer. Það voru trommur. Það var dansað.
Við komum okkur fyrir á Amager torgi og ég prílaði upp á nærliggjandi gám og sat fyrir göngunni eins og versti paparazzi og skaut á allt og alla. Þá uppgötvaði ég ekki fyrr en heim var komið að white balance stillingin á vélinni var á fluorescent .. svoleiðis að allar myndirnar hafa einhvern bláan sjarma. Bömmer! Náði samt nokkrum góðum í safnið.

...

Þessi er uppáhalds: Tvímælalaust sigurstrangleg í krúttípútt mynd ársins!

Adios amigos!

Helgi.

Dr. Starrfelt

Sat, 10 May 2008 07:56:10 GMT

Øv, Gisp og Suk! Ég er lasinn. Þvílíkt vonlaus tími til að vera með hálsbólgu. En sýklar spyrja víst ekki á undan sér frekar en aðrir hlutir. Nema ef vera skyldi Spur gosdrykkurinn sívinsæli. Ég ætla a.m.k. að láta sem ekkert C og halda mínu -i.

...

Mitt strik í dag felst í því að fara niður í miðbæ og fylgjast með danskri nálgun á kjötkveðjuhátíð með tilheyrandi dillandi bossum og sveiflandi brjóstum. Ætli Nækoninn verði ekki með í för, svona lagað verður að skjalfesta svo hægt sé að ylja sér við minninguna um hita og sólskin þegar kólna tekur. Til að toppa huggulegheitin þá er Pinseferie á mánudag, ergo 3ja daga helgi.

Við spúsan vorum viðstödd kvöldverð til heiðurs Randi, vinkonu Ö-M, í gær eftir að hún varði doktorsritgerðina sína í taugasálfræði. Þetta er hinn norski armur taugasálfræðimafíunnar sem ég er vízt viðriðinn meira eða minna. Svona Ph.D. uppákomur eru víst mun minna formlegar í Danmörku en í hinum nágrannalöndunum og t.a.m. er hægt að djóka í prófdómurunum án þess að móðga vizkugyðjuna á nokkurn hátt. Enginn hneygði sig fyrir neinum en allir skemmtu sér bara býsna vel.

Myndina prýða f.v. ægifögur eiginkona mín, Jósteinn, bróðir doktorsins (hálf-hissa) og svo unnusta hans, Ingeborg.

Norðmenn eru beztu skinn, við A-M lögðum ekki í norskuna þó, kúpluðum yfir í ensku fremur snemma í ferlinu. Hefði kannski getað gengið one-on-one en ekki í öskra-yfir-borð. Ingeborg tjáði okkur að hún væri líffræðingur en starfaði engu að síður hjá Statoil, nota bene við umhverfisrannsóknir svo hún gat alveg sofnað á kvöldin með sæmilega samvisku. Hún ætti ennfremur vinkonu sem ynni hjá Saab Aerospace við að endurbæta miðunarbúnaðinn fyrir sprengjuflugvélar. Samanborið við hana væri hún bara fremur saklaus. Nauðsynlegt að eiga vonda vini.

Vinguðumst aukinheldur við þessa konu. Ætlum saman út að leika í dag.

Ekki frjósa!

H.

Lofsöngur

Fri, 09 May 2008 13:05:43 GMT

Ó, guð vors lands! Ó, lands vors guð,
vér lofum þitt heilaga, heilaga nafn.
Úr sólkerfum himnanna hnýta þér krans
þínir herskarar, tímanna safn.
Fyrir þér er einn dagur sem þúsund ár
og þúsund ár dagur, ei meir:
eitt eilífðar smáblóm með titrandi tár,
sem tilbiður guð sinn og deyr.
Íslands þúsund ár, -
eitt eilífðar smáblóm með titrandi tár,
sem tilbiður guð sinn og deyr.

Þessi veðurspá var í boði Matthíasar Jochumssonar.

Mon, 29 Jan 2007 21:15:11 GMT

Nú er þetta orðið gott og tímabært að huga að skrifum á ný. Það þarf vízt að lifa til skrifa.

...

Orðinn eldri en þó ekki of gamall enn. Kemur að því senn. Grána taka hliðar og liðir stirðna. Hef ekki gefið upp alla von um betra líf enn og því er við hæfi að segja frá því að ég hef lagt skrúfjárnið á hilluna að sinni og hóstað upp bremsurykinu úr lungnablöðrunum; hef sezt á skólabekk til þess eins að uppfylla eigin áfangagleði og freista þess í sömu andrá að hreyfa við rykföllnum heilafrumum.

Í dag gekk ég um meðal fróðleiksfúsra í fyrsta sinn í langa hríð og ef fer sem fer þá verður svoleiðis komið fyrir mér næstu þrjú og hálft ár. Svo sannarlega er gott að vera sloppinn úr þeirri gjá er bílaviðgerðir á atvinnumannastigi geta verið þeim er þangað leggur leið sína. Annar hver maður þar á bæ hafði einhvern tíma einhverjar væntingar til fjölbreyttara lífs en aðstæður eða leti urðu svo til þess að þessir menn fundu ekki veginn út. Sömu menn glöddust þó ómælt er ég tók pokann minn og þegar þeir óskuðu mér velfarnaðar þóttist ég greina einhvern neista í augum þeirra líkt og þeir lifðu upp einhvern gamlan draum í gegnum mig. Handataki síðar voru þeir þó farnir að skrúfa á ný.

Ég veit ekki hvort grasið er nokkuð grænna hinum megin við ána eða hvort ég komi nokkurn tíma til með að verða sáttur við að keyra á sömu akrein í átt að eftirlaunum... en ég hef alltént keypt mér friðarró til næstu 5 ára.

...

Fór til Indlands á dögunum. Það var athyglisvert. Meira um það síðar meir.

...

Danskir prestar eru móðursjúkar rolur. Það var smá hvassviðri hérna á dögunum og vindstyrkurinn varð svo mikill að loka þurfti brúnni yfir til Svíþjóðar (Ó Nei!!!) Þá fannst þessum kirkjunnar mönnum við hæfi að prédika að heimsendir væri í nánd og ekki langt í óumflýjanleg endalok mannlegrar tilvistar. Ég ætla mér nú ekki að deila á heimsendaspár manna sem hafa lifibrauð sitt af því að sannfæra fólk um betra líf handan við dalinn djúpa en mig myndi langa til að benda þeim á þá staðreynd að þeir búa nú á frekar norðlægri breiddargráðu þrátt fyrir að vera meðlimir í Evrópubandalaginu og hefði nú seint myndast byggð á Íslandi ef landnámsmenn hefðu litið á byrinn í seglum sínum sem vísbendingu um leixlok. Aumingjar!

...

Skiladagurinn mikli:
Hef nú uppgötvað í fórum mínum marga þá hluti sem ekki geta talist réttlega mín eign. Þá er um einhverjar sjálfuppfærðar framlengingar á hlutum sem vinir og kunningjar, jafnvel ættmenni hafa lánað mér í góðri trú einhvern tíma í fyrndinni. Oftast er um að ræða hljómdiska eða bækur en einnig leynast þar önnur gull sem ég er viss um að fólk yrði ánægt með að endurheimta. Hugkvæmdist mér þá hvort ekki ég ætti að skila þessum hlutum einum af öðrum til upprunalegra eigenda sinna. Eigi vil ég lofa því að hér með sé komið á fót einhverjum vikulegum viðburði (ég er ekki neinn samviskulaus stigamaður!) en við skulum sjá hversu lengi þetta heldur út. Telji áhangendur mig búa yfir einhverjum þeirra eigna þá er mögulegt að koma á framfæri við mig kvörtunum sem teknar verða til greina einar af öðrum. Þá vil ég taka fram að ég hef ekki í hyggju að skila matvælum sem ég kann að hafa "lánað" af fólki í gegnum árin þar eð þau eru án efa horfin sjónum/lyktum.

Fyrsti heppni vinningshafinn í skiladögum er Freyr Bergsteinsson:

Fyrir einhverju síðan lánaði Freyr mér bókina "'Scuse me while I kiss this guy (and other misheard lyrics" sem er smávaxin gleðibók eftir Gavin Edwards með teiknuðum myndum eftir Chris Kalb. Á bókakápunni gefur að líta skopmynd af Jimi Hendrix hvar hann seilist eftir að kyssa grunlausan aðdáanda. Þannig er bókin uppfull af línum úr vinsælum dægurlögum og til hliðar má lesa brenglaðar útgáfur textanna, þ.e. hvernig textarnir hljóma í eyrum heyrnarskertra og ímyndunarbrjálaðra. Skemmtileg lesning sem ég hef haft gaman af í gegnum árin en alltaf vitað af því að bókin tilheyrði mér ekki. Í MH skemmtum við okkur vel við að lesa í gegnum hitt og þetta og uppáhald okkar allra var Deep Purple: Smoke on the Water sem í eyrum einhvers vesalings manns hljómaði "Slow Motion Walter, the Fire Engine Guy". Teikningarnar bæta svo í og gera þetta ákaflega skemmtilega bók að lesa. En nú er tími til að kveðja. Takk fyrir lánið Freyr.

...

Háttatími.

H.

A Sort of Homecoming

Thu, 22 Jun 2006 15:02:00 GMT

Við minnum á símanúmerið, 844-8183. Opið fram á sunnudag. Mætum öll.

Stjórnin.

Bonjour

Sat, 10 Jun 2006 12:30:36 GMT

Mmmm... lífið er gott. Sit hér niðri í garðinum í 25°C og er að stela interneti af einhverjum Apple eigenda. Hálf-naktar, meðvitundarlausar konur liggja eins og hræviði um allt á handklæðum og sólin skín líkt or risavaxin eldstjarna í miðju sólkerfis .. eða, já..

Búinn í prófum. Eftir hálfs árs kvíða tóxt mér að bulla mig í gegnum munnlegt stærðfræðipróf á dönsku og fékk ágætis einkunn fyrir. Mig langar til að þakka akademíunni, Tóta, Kára og ástkærum tengdaföður mínum. Þá er eftir eðlisfræðinámskeið í ágúst. Reif í fótinn!

Upp er komin ný spurning í vígbúnaðarkapphlaupi heimilanna (e. Human Race): Hvort myndir þú vilja búa hér eða hér?

Er á leiðinni í klippingu til hýra Lettlendingsins fyrir neðan.

Meira síðar.

H.

Killed to dress..

Tue, 28 Feb 2006 17:35:05 GMT

Góðan dag.

Hvernig hefur þú það? en..nóg um þig, tölum um mig núna!

Hef sterkan grun. Það er eitthvað á seyði. Er ég gægist í búrið okkar og lít yfir víðan völl matvæla sem þar er að finna auk hreingjörningaflaskna kem ég æ oftar auga á ökólógískt framleiddar afurðir af ýmsum toga, Økologisk Bornholmkylling (H5N1?), Økologisk Basmati Ris, Økologisk Uffe-Elleman Jensen, os.frv. Nú er ég maður mikillar karlmennsku en ekki svo mikillar eldamennsku og hef þannig gift mig afar heppilega, þar eð eiginkona mín...

..bíddu bíddu, mér var að detta í hug djókur:

- Ef eiginkona kaupir garn til prjónamennsku, er þar þá um eigingirni að ræða?

- "insert laughter"

OK, afsakið. Hvar var ég nú aftur... jú, þannig er eiginkona mín mjög heppilegur kostur fyrir svanga, eldar svoleiðis lostæti upp á nærri hvern einasta dag. Mitt framlag er því af skornara skammti en bæti vonandi upp fyrir það á öðrum sviðum. Hún hefur þannig færi á því að fæða mig á því sem henni dettur í hug þá og þegar.

Og þegar maður fer aðeins að spá í málin: Hvenær hefur maður not fyrir minni fjöldaframleiðslu-aukaefni í matvæli? Kannski ef maður ætlar að rækta eitthvað sjálf(ur). ..og svo er hún náttúrulega alltaf að tönnlast á því að ég megi ekki krossleggja fæturna of mikið og hvar hún sé stödd í tíðarhringnum og þ.h.

Nú eru menn mér jafnir í gáfum búnir að kveikja með mér á peru upplýsingarinnar. Ég ætti eflaust að kanna hvaða plasebó þessar "pillur" hennar eru.

Hmmm....

Hmmmmmmmmm.....

...

Við karlmenn ættum að gera okkar eigið dagatal til að svara þessu tíðarhrings gaufi kvenna. Við gætum kallað það reðurstöðuhring eða stand-tal. Yrði líka mun auðveldara að reikna fram í tímann. Dæmi:

I I I I I I i I I I I I I i I I I I I I i I I I I I I i I I I I I I i I I I I I I i I I I ...

...

En talandi um búr og eldhús, við vorum að endurnýja eldhúsið og erum núna stoltir eigendur Faktum Ståt eldhússkápa frá IKEA. Hvað annað? Fengum til okkar smið sem er prestur í hjáverkum. Eða öfugt. Man það ekki. Skrítið samt. Var að opna reikning frá pípurunum sem ég ætla að taka tíma frá í að bölva. Hann hljóðaði upp á einhverjar 140 þús. ISK og er um það bil 300% upphæðin sem hann var búinn að lofa. Kill!!

Svo er ég farinn að læra stærðfræði. Stærðfræði á dönsku. Hefði betur harkað af mér náttúrugreinabraut þegar maður á annað borð hékk þarna í Hamrahlíð. Hef enn ekki fundið not fyrir félagsfræðaprófið atarna frá '96.

Er að baka. Baka brauð.

H.

There's no such thing as paranoia, it's all in your head!

Thu, 23 Feb 2006 17:38:49 GMT

..og þá sagði Svavar Gests: "Þetta var sko reyktur lundi!".

En nóg um ykkur, tölum soldið um mig. Ég er í alvörunni ekkert feitur, í raun er ég alveg flatgrannur og hef aldrei fitnað svo ég viti til. Var soldið þybbinn sem barn en það var efalaust bara eitthvað sem teygðist á og varð aldrei meira eftir því sem ég stækkaði. Þannig er myndin í dálknum vinstra megin ekkert lík mér þannig séð. Þetta var bara eitthvað flipp þegar ég valdi mér notendanafn. ..svo á ég engin blá jakkaföt.

En nóg um mig, tölum aðeins um ykkur. Var að sjá framlag okkar til söngkeppninnar góðu í vor. Ég varð eiginlega steinhissa á hvað öll lögin sem ekki voru flutt af Sylvíu Nótt voru ömurlega úr takti við raunveruleikann og áttu einhvern veginn ekkert erindi í þessa keppni sem í dag snýst jú um trommur og klám. Hún aftur á móti (fröken Nótt) verður okkur örugglega til prýðis og sóma í Aþenu í vor.

Konunni minni til mikillar armæðu ætla ég að halda Eurovision partý hérna í íbúðinni. Umsóknir berast sem fyrst.

...

Nóg um ykkur, hér er það ég sem ræð. Stórvinur minn Þorsteinn Kristjánsson bauð mér á Þorrablót íslendingafélaxins í Kaupmannahöfn sem haldið var í Tívolí á dögunum og langar mig til að þakka honum opinberlega fyrir það. Hitti þar fyrir Inga bassaleikara sem tjáði mér að trommarinn í Sixties noti tvöfaldan bassatrommusparkara.

Riddle: If a drummer in a 60's coverband uses a doublebeater, does he make a sound?

...

Mér fannst svo leiðinlegt að heyra af því hvað Jótlendingar voru leiðinlegir við múhammeðstrúarmenn hérna um daginn að ég bakaði rjómatertu í líki spámannsins góða og fór með niður í grænmetisvöruverzlunina fyrir neðan svona bara til að sýna góðan vilja. Þeir æstu sig pínu við mig og sögðu eitthvað sem ég skildi ekki alveg þannig að ég tók fyrsta bitann, svona til að sýna þeim að hún væri bragðgóð og nuddaði svo mallakútinn og sagði "mmmmmm", en ég held kannski að þeir séu grænmetisætur. Er núna að tálga út brjóstmynd af spámanninum í ofvaxna rófu, það ætti að hitta beint í mark.

...

Ég dansa tangó á mánudögum.

..það náttúrulega verður að skíra snáðan Þröst!

Tue, 10 Jan 2006 19:25:14 GMT

Halldór Ásgrímsson hvetur Íslendinga til frekari ríðínga.

Jól

Sun, 25 Dec 2005 21:29:31 GMT

Gleðileg Jól öll sömul, nær og fjær.

Helgi.

Anders And & Co.

Sun, 20 Nov 2005 15:59:17 GMT

Yfirlýsing frá Helga Guðbjartssyni:

Í kjölfar útkomu bókar Georgs Gírlausa um Jóakim Aðalönd athafnamann hefur dagbók Helga feita borist eftirfarandi yfirlýsing frá Helga Guðbjartssyni: “Vegna ummæla Andrésar Andar um þátt Guffa í yfirlýsingu Bjargfasts skattrannsóknarstjóra varðandi mútugreiðslur Mikka Músar til hans svo rannsaka mætti meint skatt- og tollasvik Jóakims og Steggs Gæsar og fyrirtækja þeirra og yfirlýsingu Jóakims að Georg hafi ekki nennt að tala við hann í sambandi við gerð bókarinnar langar mig að koma á framfæri eftirfarandi yfirlýsingu: (gubb)”.

...

Einn í kotinu. Eiginkonan flogin á vit móður sinnar yfir helgina til að hitta fyrir æskuvinkonur og taka ljósmyndir af börnum æskuvinkvenna. Hmm.. ætli pressan komi til með að aukast eitthvað við þetta? ..nehh.. örugglega ekki.

Hef nú öðlast þrjátíu ára jarðvist án þess að eftir mig liggi einhver smábörn um víðan völl svo að ég viti. Sit nú við þann keip að ég er orðinn ráðsettur eiginmaður konu á fertuxaldri (sjá fyrri færslur) og þar af leiðandi hafa barneignir borið á góma við umræður um framtíðina. Þetta samræmist ekki framtíðarhuxjónum mínum þar sem ég átti alltaf von á því að þetta yrði bara slys, þ.e. gerðist án nokkurra áætlanagerða af minna hálfu. Því miður hef ég ekki annarra kosta völ en að horfa í spegil og sjá það að ég er sjálfur kominn á fertuxaldur og ætti því að teljast nokkuð fullorðinn maður.

Nú hef ég ekkert á móti börnum. Margir af mínum beztu vinum eru reyndar börn, þ.e. frekar óþroskaðir einstaklingar sem geta þó labbað, borðað, skitið, borgað skatta án hjálpar og skemmt mér við tækifæri. Þannig hef ég alltaf getað sagt þeim að fara ef þau voru orðin leiðinleg.

Það gæti ég ekki gert ef ég leggði eigið nafn við framleiðsluferilinn.

...

Jólin koma.

H.

Húrra Húrra Húrrraaaaaaaaaaaaaaaaa

Sun, 16 Oct 2005 09:20:43 GMT

Hey, vissuð þið að lénið http://www.al-qaeda.com/ er ekki í notkun. Ég ætlaði að vera hjálplegur og benda Bandarísku Alríkislögreglunni á að upplýsingar um dvalarstað Bin Ladens kynnu að finnast á heimasíðu samtakanna en þeir hafa e.t.v. kynnt sér þann möguleika fyrr.

...

Nú í fyrrakvöld fæddist nýr ríkisarfi á Landspítalanum í Kaupmannahöfn þegar Mary prinsessa kreisti út 14 marka dreng. Danir eru vitaskuld gjörsamlega að sleppa sér úr tryllingi yfir þessum heimsatburði og fánar voru dregnir að húni og fjölmiðlar undirlagðir af frásögnum um hina nýbökuðu foreldra og frumburðinn góða. Gamlar konur stinga saman nefjum á götuhornum og tala um hversu dejlig þetta sé allt saman og fyrrverandi hermenn klökkna af þjóðarstolti.

Í sjónvarpi hefur umfjöllunin spannað margra klukkustunda langa þætti um allt sem snýr að hinum eðalborna og hvaðeina sem kemur til með að verða í framtíðinni. Fréttamenn hafa á köflum verið svo agndofa yfir þessu að þeir hafa fengið í sjónvarpssal til sín hjúkrunarkonur frá nærliggjandi spítölum til að útskýra fyrir þjóðinni þetta undur lífsins; fæðinguna. Þá hafa læknismenntaðir einnig látið eftir sér hafa að nauðsynlegt komi til með að reynast að fylgjast grannt með fyrstu dögunum í lífi prinsins, hvort honum sé kalt, hvort hann sé svangur, hvort húðin sé gul, o.s.frv.

Fyrir mitt leyti, þá efast ég stórlega að ég komi til með að mæla með Landspítalanum í Kaupmannahöfn þegar mín kona kemur til með að fá hríðir ef þetta er ekki sjálfsagðir vinnuhættir með þá sem ekki eru svo lukkulegir að fæðast með blátt blóð, silfurskeið í munni og Se&Hør ljósmyndaflass við hvert fótmál.

..en konan mín á svosem ekki von á barni.

Í annað sinn er ég óvart gekk fram hjá sjónvarpstæki þá var búið að fá stjörnufróðan mann í sjónvarpssal sem setið hafði bakið brotnu yfir stjörnukorti fyrir verðandi krónprinsinn. Þarna sat hann í fullri alvöru og benti á hvar Merkúr væri í fimmta húsi vatnsberans væri afar líklegt að snáðinn yrði mjög hæfur í samskiptum við blaðamenn þegar fram sækti(?!?). NB, þetta var ekki neitt lókal áhugamannasjónvarp heldur ríkisrekinn risafjölmiðill.

...

Fór með spúsunni á Laundromat í gær sem er einhver stílíseruð hornkrá þar sem einnig má hafa með sér óhreina tauið til vasks. Þetta ku vera nýjasta afurð eins af ástsælustu glanshommum ættjarðarinnar en þetta var bara nokkuð kósý hjá honum.

Á föstudaginn var Menningarnótt hér í Mannahöfn kennd við Kaupsýslu. Tókst ekki betur til en svo að tengdapabbi féll við á einhverri gangstéttinni og braut aðra framtönnina í sér. Úff, ég fann til með karlinum þar sem ég þekki þetta af eigin raun, er ég var 8 ára eða svo þá hjó ég eigin framtönn í gangstéttarhellu í Stóragerðinu, fór í rótarfyllingu hjá Dr.Tanndauða og hef þurft að lifa við stórskerta fegurð allar götur síðan. Hefði án efa farið í Verzlunarskólann og gengið í gegnum meðal-líf hefði ég ekki orðið fyrir þessu hræðilega slysi sem gerði mig að utangarðsmanni og MH-ingi.

Tengdó tók til Tannsa
Tannsi tók til handa
Hendi hafð'í hanska
Tönn varð eigi bjargað

H e l g i

Kollektiv

Wed, 12 Oct 2005 20:00:02 GMT

Ég fékk ömurlega fyndna hugdettu um daginn: Hvað ef allir dægurlagatextar yrðu að vera sungnir frá fyrstu persónu fleirtölu þegar um hljómsveitir væri að ræða en sóló artístar yrðu að hafa allt í eintölu? Hljómsveit er vitaskuld hópur fólks sem kemur saman undir einhverju einu nafni og þess vegna ættu skoðanir söngvarans einmitt að vera skoðanir heildarinnar, ekki satt?

Þetta komst ekki lengra með að vera sniðugt en með hljómsveitinni Heart sem á níunda áratugnum gerði lagið "All I Wanna Do is Make Love to You". Frekar ruddalegt.

H.

Mig langar í kött

Mon, 10 Oct 2005 19:00:36 GMT

Las á fréttavef Morgunblaðsins nú á dögunum að Michael Jackson væri í Lundúnum þessa dagana. Alveg er mér nú slétt sama hvar hann heldur sig blessaður en engu að síður er heilinn á mér áskrifandi að auðlesnu efni og hefur gaman af að kjamsa á ómerkilegheitum sem þessum. Það sem vakti þó furðu mína við þessa frétt er lokaklausan:

- "Á föstudag gaf Jackson eiginhandaráritanir eftir að aðdáendur höfðu elt hann gegnum bílakjallara nálægt hljóðveri í borginni."

Þetta hljómar svolítið eins og Jackson sé fágæt dýrategund sem fuglaskoðarar elti út um allar jarðir (og bílageymslur) en fáránlegast af öllu er síðasta setningin:

- "Talið er að Jackson sé í Lundúnum til að taka upp lag til stuðnings fórnarlömbum fellibylsins Katrínar."

Þarna er líkt og verið sé að gera að því skóna að enginn viti hvers vegna Jackson er staddur í Lundúnum og það sé einungis á færi vísinda- og spámanna að finna það út. Þá sé ómögulegt að spyrja hann eða einhvern úr liðinu hans hvað í fjáranum hann sé að vilja upp á dekk. Hann er gersamlega rúinn öllum persónueinkennum með þessari einu setningu. Ekki nóg með að vesalings maðurinn eigi bágt með að falla í hópinn til að byrja með heldur þarf hann nú að berjast til að hreinlega geta talist homo sapiens.

Fyndið. Kannski hefur þetta samt alltaf verið málið. Ég er oft lengi að fatta.

...

Fleiri tónlistarfréttir: George Martin er að missa heyrnina. Paul McCartney hefur viðurkennt að þetta geti mögulegast skrifast á hversu hátt The Beatles þurftu að spila í hljóðverum þarna í fyrndinni. Engu að síður hefur það ekki hamlað Sir Paul að biðja George um að hljóðblanda næstu plötuna sína. George Martin ku hafa afþakkað pent.

Helgi.

Four your ice only

Sat, 08 Oct 2005 20:50:16 GMT

Hmm... sá út um gluggann á íbúðinni okkar um daginn hvar einhverjir unglingaræflar voru að sveifla sér í köðlum og velta reiðhjólum um koll, þar á meðal konunnar minnar. Án þess að spá meira í því rauk ég niður stigann og ætlaði að lesa yfir hausamótunum á skemmdarvörgunum eins og vera ber en á leið minni niður stigann varð mér hugsað til þess hvurn andskotann ég ætti eiginlega að segja við þá þar sem danskan mín er fremur bágborin. Ég var búinn að ákveða að leggja upp með "Hvad fanden laver I?!" og láta það svo bara þróast þaðan, enda ekki með mikla reynslu af pædagógík.

Spellvirkjarnir höfðu fært sig um set þegar ég kom út og ég lét bara nægja að gefa þeim illt augnaráð og gekk svo frá köðlunum til þess að gera þeim erfitt fyrir að halda áfram tarzanleiknum sínum.

Kaðlarnir eru náttúrulega þarna vegna þess að verktakafíflin sem eru að gaufa á þakinu okkar ganga aldrei almennilega frá eftir sig. Svo eru stillásarnir utan á húsinu að gera mig nett pirraðan.

Hrmppffff.

...

Fór yfir Eyrarsundið til Malmö í dag með tengdapabba og dóttur hans. Ekkert ofboðslega frásegjanlegt en við áttum góðar stundir í sumarblíðunni. Stuttermabolaveður búið að vera hérna siðustu viku. Alveg hress með það. Jamm.

...

Þá er búið að bóka jólaheimferð þessa árs og í þetta skiptið er ég væntanlegur annan í jólum en verðu einungis í viku sökum fátæktar. Gæti þurft að ganga svo langt að skipuleggja dvölina fyrirfram en tilhugsunin um að leggja það á mig veldur mér ónotum niður í milta. Látum þetta bara ráðast.

H.

Nyheder

Thu, 06 Oct 2005 18:05:50 GMT

Ég fór í röntgenmyndatöku í gær og sat fyrir með hnéin á mér. Brjókslos eða slitgigt, að minnsta kosti er það á hreinu að maður er ekkert að yngjast og kroppurinn er farinn að hrörna hægt og rólega. Kannski maður ætti að fara huga að því að fjölga sér svo það lifi eitthvað eftir af manni þegar farið verður á veiðilendurnar miklu. Það getur ekki verið mikið eftir nú. Eftirfylgjandi er heilsufarsferillinn:

- Magaverkir
- Fallið saman lunga
- Hnévandræði
- Dauði

Þetta síðast talda er að vísu spádómur og getur reyndar ekki talist vera heilsufarsvandamál sem slíkt en er þó rökrétt framhald af því sem á undan kemur.

...

Ég tala íslensku einu sinni í viku að staðaldri nú á dögum og hef haft af því áhyggjur að málþroski minn komi til með að verða fórnarlamb aðstæðna. Ég á nú efalaust ekki eftir að gleyma íslenskunni í bráð en ég held samt að ég eigi eftir að verða höktandi hálfmælgingur í stað hnyttins heldrimanns þegar fram sækir. Hvur fjandinn er til ráða? Skype?

username: helgihelgi

...

Uppvask.

H.

Arbeit Arbeit

Tue, 27 Sep 2005 19:10:31 GMT

Sæl verið þið.

Nú hefur verið komið á sambandi við umheiminn í formi nettengingar og heimasímanúmers á Tagensvej 73 og ekki í fleiri afsakanir að venda að láta ekki af sér vita.

Innflutningshófið sem haldið var á laugardaginn var gekk framar vonum og flestir létu sjá sig. Herra og frú Best komu óvænt frá klakanum og sömuleiðis komu Tim og Chris nokkur frá landi Breta. Restin var meira eða minna danskir og skerverjar í útlegð. Magga og Maggi komu, Magga kom meira að segja tvisvar :D Þrír blökkumenn kíktu inn en til allrar lukku voru hljómtæki og önnur dýrðmæti látin í friði.

Jamm.. annars erum við hjónin nú búin að vera gift í rúma þrjá mánuði og vantar aðeins einn upp á til að komast yfir meðallengd almenns Hollywood hjónabands. Finnst ég ekki vera neitt sérstaklega giftur samt sem áður. Ekki það að maður sé að elta gæsir alla daga lengur þar sem maður situr nú á gullgæsinni (góð myndlíking) en engu að síður er engin sú tilfinning að allt sé öðruvísi núna. Þessu svipar eflaust til þess þegar maður fermdist og Jesú mætti ekki í veisluna með vélsleða eða hljómflutningstæki til að bjóða mann velkominn í klúbbinn. O jæja, ég er afar hamingjusamur með kvonfangið og er frekar stoltur af mér að hafa landað þessu öllu. Nú er bara að sjá hvað er næst.

Ég setti persónulegt met í hjólreiðum í dag: hjólaði heim úr vinnunni frá Kastrup heim á Nørrebro á 33 mínútum. Þetta eru ca. 12-14 kílómetrar, á eftir að mæla það nákvæmlega en að komast þetta á ríflega hálftíma í þéttri umferð verður að teljast aðdáunarvert. Í það minnsta hefur konan mín eytt þónokkru skjalli í að hrósa rassvöðvunum mínum fyrir aukin þéttleika og fagrar útlínur. Annars er það helst í fréttum hérna á ljósvakanum að fleiri og fleiri Danir geispi golunni árlega vegna því sem talið er vera aukin mengun í borginni og er það mat manna að hjólreiðafólk verði helst fyrir barðinu á útblæstri bifreiða. Kannski getur maður samt látið gott af sér leiða og ánafnað einhverjum hornhimnuna (nema hún sé það sótmettuð að enginn hafi áhuga).

Snorri Hergill að meika það í Lundúnaborg þessa dagana. Go Snorri!!

Svabbi að sigra trúbadorakeppnir í Reykjavíkurborgum. Go Svabbi!!

Davíð Oddsson bara að verða seðlabankastjóri?! Ég sagði líka alltaf að það yrði eitthvað úr drengnum!

...

Ef þessu Baugsrugli linnir ekki á næstu vikum ætla ég aldrei aftur að flytja til Íslands.

...

Ég hef verið með hægðatregðu upp á síðkastið. Getur einhver sent mér nýlegt eintak af Séð & Heyrt?

H.

P.S. Heimasímanúmerið okkar er (+45) 35 82 71 92